Mae Billy Maxwell Taylor yn wneuthurwr theatr amddisgyblaethol ac artist dawns amgylchol sy’n creu munudau o lonyddwch yng nghanol prysurdeb bywyd. Mae ei ymarfer yn tynnu ar ymchwil mewn butoh, cyswllt, a myfyrdod, tra hefyd yn ystyried dawns bywyd bob dydd: gwneud coffi, cerdded yn y parc, a garddio. Ar ôl iddo astudio am radd BA mewn Celfyddydau Theatr Ewrop yng Ngholeg Rose Bruford, ac MA mewn Ymarfer Dawns Ymestynnol yn y London Contemporary Dance School, mae e wedi llunio profiadau theatraidd ar gyfer cynulleidfaoedd ledled Cymru a’r DU, megis ei unawdau Rain Pours Like Coffee Drops a Gentle Streams, a’i waith ensemble parhaus, In the Silence of Blossom. Yn ogystal â Ransack, cefnogwyd ei ymarfer creadigol gan The Place, Cwmni Dawns Cenedlaethol Cymru, Richard Chappell Dance, Volcano, Span Arts, Swindon Dance, Pavilion Dance South West, a chwmnïau eraill yn y DU.

 

Daeth Billy i gysylltiad â Chwmni Dawns Ransack am y tro cyntaf drwy eu rhaglen Arrive at Home/Cyrraedd Adref, gan gomisiynu a chefnogi camau cyntaf Gentle Streams. Datblygwyd hyn i greu darn awr o hyd yn haf 2025 gyda chefnogaeth Cyngor Celfyddydau Cymru. Bryd hynny, perfformiodd Billy ochr yn ochr â Chwmni Ieuenctid Ransack. Cymerodd ran hefyd yn ein rhaglen hyfforddi ‘Explore’ yn YMa yn 2025. Y gwanwyn hwn (2026) mae Billy’n ymuno â Ransack fel dawnsiwr cwmni ar gyfer y cam ‘R&D’ olaf o’n cynhyrchiad dwbl newydd, ‘States of Being’ a bydd yn ymuno â chast ein cynhyrchiad teithiol newydd, ‘Us and Them’ y bwriedir ei aildeithio yng ngwanwyn 2027.