Cymraeg Directors | ransackdance

John Graystone, Cadeirydd y Bwrdd

Mae Dr John Graystone yn arweinydd nodedig ym maes addysg yng Nghymru, a chanddo dros ugain mlynedd o brofiad ym maes addysg bellach ac addysg oedolion. Mae wedi dal nifer o rolau arwyddocaol, megis Prif Weithredwr Colegau Cymru, cyfarwyddwr dros dros y Sefydliad Cenedlaethol Addysg Barhaus i Oedolion, a Chadeirydd Gweithredol Agored Cymru. Ar hyn o bryd, ef yw Cadeirydd Agored Cymru ac Addysg Oedolion Cymru, ac mae’n aelod o Gyngor Cyllido Addysg Uwch Cymru, a Chorff Adolygu Cyflogau Annibynnol Cymru, ac mae’n un o lywodraethwyr Coleg Pen-y-bont ar Ogwr.

Mae Dr Graystone wedi gweithio gyda thros 200 o gyrff llywodraethol ac uwch-dimau rheoli ledled y DU ac yn rhyngwladol, gan ddarparu gwasanaethau ymgynghori. Cydnabuwyd ei gyfraniadau i fyd addysg trwy dderbyn statws Cymrawd er Anrhydedd o Goleg Sir Gâr a Choleg Pen-y-bont, Medal y Canghellor o Brifysgol Morgannwg, a gwobr cyflawniad oes a gyflwynwyd gan y Times Educational Supplement yn 2017.

Nick Banwell, Aelod o’r Bwrdd

Ers iddo raddio gydag MA mewn Cynhyrchu Theatr a’r Cyfryngau ym Mhrifysgol Hull, mae Nick Banwell wedi mwynhau gyrfa’n ymestyn dros bedwar degawd mewn rheoli theatr. Gan weithio’n gyntaf gyda’r No 1 Touring, Theatre-in-Education a’r Regional Repertory yn Lloegr, mae ganddo wybodaeth eang o’r sector cyflwyno yng Nghymru fel Cyfarwyddwr yn y Borough Theatre, Y Fenni, am dros 20 mlynedd, ac yn ddiweddar bu’n Gyfarwyddwr Creu Cymru cyn ymddeol yn 2019. Ac yntau’n gyn-aelod o Banel Dawns Cyngor Celfyddydau Cymru a Phwyllgor Rhanbarth De Cymru, bu hefyd yn aelod o fwrdd yr Independent Theatre Council, Creu Cymru a Dance Blast, prosiect dawns a sefydlwyd pan oedd yn bartner gyda’r Carlson Dance Company yn y Borough Theatre yn 1998.

Angharad Lee, Aelod o’r Bwrdd

Mae Angharad Lee yn gyfarwyddwr a chynhyrchydd llwyddiannus sy’n gweithio ar draws nifer o ddisgyblaethau; mae ganddi ddiddordeb mawr yn natblygiad sector y theatr gerdd a’r sector Gymraeg yng Nghymru. A hithau wedi graddio o’r Academi Gerdd Frenhinol a Choleg Brenhinol Cerdd a Drama Cymru, mae ei gwaith yn cwmpasu meysydd Theatr Gerdd, Opera a Dramâu yn ogystal â dysgu creadigol. Mae hi’n siarad Cymraeg yn rhugl.

Ar hyn o bryd mae hi’n Bennaeth Actio yn Academi Llais a Chelfyddydau Dramatig Cymru yng Nghaerdydd, yn ogystal â bod yn Gyfarwyddwr Artistig Cynyrchiadau Leeway. Mae hi wedi gweithio i sefydliadau megis Opera Cenedlaethol Cymru fel aelod o’r staff a chyfarwyddwr llawrydd, Theatr Sherman, Arad Goch, Theatrau RhCT, Eisteddfod Genedlaethol Cymru a llawer mwy, gan gyfarwyddo gweithiau newydd yn ogystal â chynyrchiadau prif- raddfa. Mae ei harbenigedd mewn gweithio gyda chast niferus, cerddoriaeth ac ensemblau – rhywbeth sy’n rhoi pleser mawr iddi.

Fel Cyfarwyddwr Artistig Cynyrchiadau Leeway, cafodd y cynhyrchiad arbennig ac arloesol The Last 5 Years ei ymdrin mewn modd unigryw ac emosiynol gan dalentau anhygoel ym maes theatr gerdd, perfformwyr B/byddar, a choreograffi hyfryd gydag IAP/BSL wedi’i integreiddio gan y coreograffydd Mark Smith, sydd ei hun yn Fyddar. Rhestrwyd The Last 5 Years fel un o 10 uchaf Cynyrchiadau Rhanbarthol 2018 gan y cylchgrawn The Stage.

Nia Morgan, Aelod o’r Bwrdd

Darlithydd yn y Celfyddydau Perfformio yng Ngholeg y Cymoedd yw Nia Morgan,ac mae ganddi gefndir proffesiynol sy’n cynnwys bale, dawns gyfoes, ac ymgysylltiad cymunedol. A hithau wedi ennill ysgoloriaeth i’r Northern Ballet School, datblygodd ei hyfforddiant cynnar drwy ystod o raglenni dawns ledled Cymoedd De Cymru. Mae Nia wedi addysgu’n eang fel ymarferydd dawns gymunedol ac athrawes bale yn yr SLDA Dance Academy, a bu’n gweithio fel artist llawrydd gyda Ransack ar eu rhaglen Explore. Mae hi wedi ymrwymo i ymarfer celfyddydol cynhwysol, gan hyrwyddo mynediad i ddysgwyr a chanddynt Anghenion Dysgu Ychwanegol, a rhai o gefndiroedd cymdeithasol-economaidd difreintiedig.

Tom Kemp Aelod o’r Bwrdd

Mae Tom yn actor a chyfarwyddwr symudiadau dwyieithog o Bontypridd sydd wedi cael gyrfa amrywiol mewn gwahanol feysydd – byd teledu, hysbysebion, sioeau cerdd, a theithio o amgylch y DU. Mae ei rannau nodedig yn cynnwys Broadchurch (ITV), Da Vinci’s Demons (FOX), a theithio’r DU gyda Joseph and the Amazing Technicolour Dreamcoat. Fel cyfarwyddwr symudiadau a choreograffydd, mae Tom wedi gweithio ar ystod o
gynyrchiadau yn genedlaethol a rhyng-genedlaethol.

Ynghyd â’i yrfa fel perfformiwr, mae gan Tom brofiad mewn marchnata a chyfathrebu, gyda ffocws arbennig ar farchnata digidol, rheoli cyfryngau cymdeithasol, a chyfathrebu strategol. Mae wedi gweithio ar draws nifer o sectorau, ac mae ganddo wybodaeth a phrofiad o bolisi’r iaith Gymraeg, cydymffurfio, a deddfwriaeth, yn enwedig o fewn y sectorau addysg ac elusennol.

Sarah Rogers, Cyfarwyddwr Artistig

Sarah sy’n arwain gweledigaeth artistig Ransack, gan goreograffu cynyrchiadau gwreiddiol a goruchwylio gwaith cydweithredol gyda dawnswyr, cerddorion, ac artistiaid ffilm. Yn ogystal â chreu cynyrchiadau teithiol – yn cynnwys Murmur (2019) ac Us and Them (2023–24). Mae Sarah wedi cynllunio a chyflenwi rhaglenni datblygiad cymunedol Ransack a mentrau dawns cymunedol, megis y rhaglen Gyda’n Gilydd mewn partneriaeth gydag YMa (gynt Cymuned Artis), a rhaglen allanol hynod lwyddiannus oedd yn cynnwys elfen unigryw y cwmni, sef yr olygfa ‘fflach-dorf’, oedd yn rhoi cyfle i aelodau o gymunedau ledled Cymru berfformio ar y llwyfan ochr yn ochr â’n dawnswyr proffesiynol.

Ynghyd â’i harweinyddiaeth greadigol, mae Sarah hefyd yn rheoli datblygiad strategol Ransack, gweithrediadau, a chodi arian, gan ymgymryd â nifer o rolau gwahanol yn cynnwys Prif Weithredwr, Rheolwr Cyllid, a Chynhyrchydd rhwng cyfnodau ariannu. Mae ei harweinyddiaeth amlddisgyblaethol wedi gosod Ransack mewn safle gref o fewn ecoleg dawns yng Nghymru.

A hithau wedi derbyn hyfforddiant yn y Trinity Laban Conservatoire of Music and Dance (BA Anrhydedd mewn Theatr Dawns), cwblhaodd Sarah brentisiaeth gyda Chwmni Earthfall Dance a bu’n perfformio gydag artistiaid megis Rosemary Butcher, Charles Linehan, Kerry Nicholls, a 2Faced Dance. Fel coreograffydd, mae hi wedi cyflwyno gwaith yn y Resolution Festival, Llundain, ac wedi datblygu ymarfer eang mewn addysg dawns a chyfranogiad. Mae profiad Sarah yn cynnwys rolau fel Rheolwr Addysg gyda 2Faced Dance, Llysgennad Dawns gyda Chwmni Dawns Cenedlaethol Cymru, ac artist arweiniol ar gyfer nifer o brosiectau Ysgolion Creadigol ledled de Cymru. Mae hi’n parhau i gyflwyno dosbarthiadau dawns cynhwysol gyda Dance Blast yn Y Fenni, lle mae hi’n cyfarwyddo’r cwmni oedolion MCDC.